|
|
|
SKREIÐARBISKUPINN OG
|
Um verkiðSkreiðarbiskupinn og sveinar hans gerist á krá á eyjunni Biskops-Arnö í Svíþjóð, í Danmörku, á Englandi og á Íslandi á árunum 1425 - 1436 og fjallar um endalok hins danska aðalsmanns Jóhannesar Gerechini Lodehat sem varð erkibiskup í Uppsölum og biskup í Skálholti og er betur þekktur í Svíþjóð og á Íslandi sem Jón Gerreksson. Á krána koma nokkrir farandleikarar og fara að segja sögu Jóns en Biskops-Arnö er fyrrum sumardvalarstaður Uppsalaerkibiskupa en frá því embætti hafði Jón verið hrakinn vegna hneykslismála. Æskuvinur hans, Eríkur af Pommern konungur Norðurlanda, útvegar hinum fallna erkibiskupi biskupsdæmi norður á því hræðilega landi, Íslandi, þar sem menn hafa fyrir satt að hlið helvítis sé í eldfjallinu Heklu. Eiríkur gerir hann einnig að hirðstjóra sínum og Jón verður ekki sérlega vinsæll þegar hann fer að krefja Íslendinga um skatt og eyðileggja ábatasöm viðskipti þeirra við Englendinga. Jón hefur um sig her manns og sveinar hans vinna sér það til óhelgi að drepa íslenskan höfðingja og brenna bæ hans. Endalok Jóns biskups Gerrekssonar verða þau að íslenskir höfðingjar troða honum í poka og drekkja honum í Brúará. Þegar farandleikararnir segja söguna á kránni eru liðin þrjú ár frá þeim atburði og það kemur fljótlega í ljós að fiskur er undir steini og sumir tilheyrendurnir eru tvöfaldir í roðinu og vita meira um atburðina á Íslandi en þeir hafa látið uppi.
Skreiðarbiskupinn og sveinar hans var frumsýnt í Sumarleikhúsinu á Biskops-Arnö 21. júní 2003 í þýðingu Sture Ekholm undir nafninu Biskopens skugga.
|
