Húsvörðurinn
Að hrökkva eða stökkva - það er spurningin
Hvort er betra að sitja öruggur í konungsríki músarholunnar
eða sigla þann sæ sem liggur til glötunar eða gæfu
Við getum klætt hugleysi okkar í skrautlegan dulbúning
Kallað það samviskusemi, tillitssemi eða nærgætni
Réttlætt það að vera kyrr
í stað þess að leggja á djúpið og veiða
kynlega fiska
Gefa fólki enga átyllu til árásar
Taka tveim fingrum um rassgatið á sér
og draga það upp yfir höfuðið
Hverfa
Hverfa
Hverfa.
Það er engin virðing fyrir neinu lengur. Ha?!
Menn strá bara öskunni hvar sem er og drepa í á gólfinu
Fleygja tyggjóinu á stéttina og troða það
niður
Og krakkaskrattarnir, síhrækjandi
mér þætti gaman að vita hvort þau gera það
heima hjá sér. Ha?!
Eru börn ekki alinn upp lengur? Ha?!
Mig langar bara til að vita það
Hvað er eiginlega að verða um þennan heim? Ha?!
Ég get bara sagt þér það að ef ríkið
borgaði mér meira
en þessar hraksmánarlegu bætur
sem hvorki er hægt að lifa né deyja af
þá myndi ég ekki vinna hérna. Ha?!
Nei
Þá væri sjálfsagt einhver útlendingur hérna
að skrúbba skítinn undan þessu pakki. Ha?!
Svo er manni skammtaður skítur úr hnefa
fyrir þetta
skítur úr hnefa
skilurðu það?
Ég ætti eiginlega að vera fluga
og éta skít
og líka það vel
Það er allt að fara til andskotans
allt til andskotans..
En mér má vera sama
ég stend einn
og ber ekki ábyrgð á neinum
því enginn elskar mig
auðvitað lítur engin við mér
á mínum launum
og ef ég ætti að gera eitthvað í því
þá yrði ég að panta eina í póstkröfu
að austan
Maður þarf að vera stórþjófur
til að hafa efni á íslenskum kvenmanni
en ég hef aldrei haft hug til að stela stórt
og þessvegna...
Sko
ef þetta fína lið lendir í einhverjum leiðindum
þá er það bara annus terribilis hjá því
en það er sko ekkert nýtt fyrir okkur
það eru ekki einusinni tvö N hjá okkur
það er bara anus terribilis
sko
þetta gengur allt útá að láta taka sig í
görnina
það vill bara þannig til að ég er listam.. öryrki
og veit hvenær er verið að taka mig í rassgatið...
Ég ætti bara að vera hommi
og vera tekinn í rassgatið
og líka það vel
Og til að verjast okkur
þá erum við alin upp í því
að öll dýrin í skóginum eigi að vera vinir
öllu lukkudýrin í djöfulsins laufskóginum eiga
að vera vinir
öll dýrin í fjármálafrumskóginum eiga
að vera fokkings vinir
og bíða bara spennt eftir því að vera tekin í...
Ég ætti að vera hommi
og líka það vel...
Nei annars
ég hef engan áhuga á asískri
það á ekki við mig
Því skildi ég drösla einhverri kerlingu
yfir hálfan heiminn
til að koma mér upp nýjum misskilningi?
Nóg er nú samt
Adolf gerði eitthvað rétt þar
að halda þessu aðskildu
í stað þess að blanda saman fullt af fólki
sem skilur ekki hvert annað
svo allt fari endanlega til andskotans
Aumingja Adolf
þeir fóru illa með hann í akademíunni
það eina sem hann langaði til
var að verða listamaður
skapa
Einhver ætti að segja sögu hans
einhver sem hefur samúð með sögupersónunni
einhver sem þorir að skoða manninn
án þess að nota lituð sjóngler sögunnar
(Kallararödd)
Adolf Schickelgruber frá Braunau
Þjóðverji
Kaþólskur
Faðirinn tollheimtumaður
Prófteikning ekki fullnægjandi.
(Eðlilega)
Við hverju var að búast með önnur eins viðfangsefni:
1. Adam og Eva rekin úr paradís
2. Viðburður úr syndafallinu
3. Kainn drepur Abel
Öll viðfangsefnin voru júðsk eins og dómararnir
En hann gafst ekki upp
og fór í annað sinn
(Kallararödd)
Adolf Schickelgruber frá Braunau
Þjóðverji
Kaþólskur
Faðirinn tollheimtumaður
Var ekki leyft að gangast undir próf
(Eðlilega)
En hann gafst aldrei upp
Hann sleppti allri skólagöngu og byrjaði að mála
og eins og við var að búast varð hann fyrir barðinu á
gagnrýnendunum
þessum mönnum sem lifa eins og sníklar á listamönnum
og eru jafnforheimskir og aðrir sníklar
kunna sér ekki hóf
og grafa undan eigin tilveru
því þeir hætta ekki fyrr en hýsillinn er dauður.
(Sjálfsánægjuleg gagnrýnisrödd)
Öll myndbygging herra Schickelgrubers er með eindæmum stirðbusaleg.
Þetta kemur ef til vill ekki að sök þegar máluð
eru hús eða tré í logni en þegar herra Schickelgruber
ætlar að mála fólk fer að vandast málið.
Því allar hans myndir af fólki eru eins og það
sé ekkert líf í því, sem er afskaplega bagalegt
þegar fók á í hlut. Sé herra Schickelgruber
þeirra skoðunar að það sé aukaatriði hvort
fólk er lifandi eða ekki ætti hann að snúa sér
að einhverju öðru. Eins og til dæmis húsamálun.
(Eðlilega)
Engin trúir almennilega á mann nema mamma
Aumingja mamman hans Adólfs
sem þoldi ekki mótlætið sem sonurinn varð fyrir
og sprakk úr harmi.
Hann, hún og Höfundurinn smella fingrum í takt
(Syngur)
Ég skal mála yfir heiminn elsku mamma
eins og sólskin bjart og jafnt
Þó dimmi að með daga kalda skamma
dagar þínir verða ljósir allir samt
Litlu blómin sem þig langar til að kaupa
skal ég lita hér á teikniblaðið mitt
Ég skal mála allan heiminn elsku mamma
svo alltaf skíni ljós í húsið þitt
Mamma ertu sorgmædd seg mér hvað er að
sjálfsagt get ég málað gleði yfir það
ótal fagra liti á ég fyrir þig
ekki gráta mamma - brostu fyrir mig
Ég skal mála yfir heiminn elsku mamma
eins og sólskin bjart og jafnt
Þó dimmi að með daga kalda skamma
dagar þínir verða ljósir allir samt
Litlu blómin sem þig langar til að kaupa
skal ég lita hér á teikniblaðið mitt
Ég skal mála allan heiminn elsku mamma
svo alltaf skíni ljós í húsið þitt
("Ég skal mála yfir heiminn elsku mamma" er vinsælt
barnalag. Lagið er sænskt en textann gerði Hinrik Bjarnason.
Lagið er þarna vegna þess að það þjónar
framvindunni betur en nokkuð annað sem höfundi dattt í hug
og vonar hann að það verði virt honum til vorkunnar að
það er ekki frumsamið. B.Æ)
© Benóný Ægisson
|