LÝÐVELDISLEIKHÚSIÐ

Út í kött!

Dans og söngleikhús fyrir börn

Út í kött! er ævintýraleikur með dansi og söng, fyrir börn á aldrinum fjögurra til tólf ára en fullorðnir ættu líka að hafa gaman að þessu fjöruga verki. Leikin atriði mynda skemmtilega umgjörð utan um söng- og dansatriði þar sem ævintýrapersónur í litríkum búningum bregða á leik.

Erpur (12 ára) neyðist til að taka á móti dóttur vinafólks foreldra sinna inn í herbergið sitt. Helga Soffía (11 ára) er hress og hraðlýgin og kann frá mörgu undarlegu að segja. Erpur á erfitt með að sætta sig við þennan gest sinn, enda snýr hún heimi hans, þar sem hetjur teiknimynda og tölvuleikja eru karlmenn, á hvolf. Með fjörugu ímyndunarafli sínu nær hún að sýna honum að tilveran þarf ekki að vera niðurnjörvuð í fyrirfram ákveðin hólf og kassa. Sögur Helgu Soffíu eru þrjú Grimms-ævintýri byggð á útgáfum Roalds Dahl og fléttast þau inn í leikverkið með tónlist, dansi og söng. Þar birtast Rauðhetta, Öskubuska, prins, úlfar og grísir en Rauðhetta er enginn ráðvilltur sakleysingi sem lætur éta sig mótþróalaust og Öskubuska áttar sig á að hamingjan felst ekki í því einu að vera fótnett og fríð. Í leikhópnum eru leikari, dansari og söngvari ásamt tveimur börnum sem leika þau Erp og Helgu Soffíu, en aðrir þátttakendur munu bregða sér í hin ýmsu hlutverk ævintýranna.

Í ævintýraleiknum Út í kött! er staðalmyndunum gefið langt nef og hláturinn notaður til að opna augu áhorfenda fyrir því að heimurinn er ekki eins svart/hvítur og hann sýnist. Það er því mikilvægt, í allri þeirri fjölbreyttu flóru skemmtana sem standa börnum til boða, að þau geti einnig séð sýningu sem vekur þau til umhugsunar um viðtekin gildi. Á Íslandi er félagslegt jafnrétti langt á veg komið en á sama tíma eru skilaboðin sem börnin okkar fá úr umhverfinu og úr fjölmiðlum vægast sagt tvíræð. Stelpur eiga að vera sætar, undirgefnar og óvirkar en strákarnir eiga að vera ofurvirkar hetjur. Í þessu verki er staðalmyndum kynjanna hins vegar kollvarpað og viðteknum gildum ögrað.

Markmiðið með sýningunni er að vekja börn og fullorðna til umhugsunar um birtingarmyndir staðalmynda í umhverfi barnanna. Mikilvægi skapandi og gagnrýninnar hugsunar er seint ofmetið og því brýnt að börnin fái tæki og tól í hendurnar til að takast á við flóðbylgju skilaboða úr umhverfinu. Sýningin er farandsýning og með henni fylgir kennsluefni sem gefur kennurum tækifæri til frekari úrvinnslu á grundvelli leiksýningarinnar.

Persónur og leikendur:
Erpur, ljót systir og skynsamur grís
Fannar Guðni Guðmundsson
Helga Soffía, amma, ljót systir og heimskur grís
Sóley Anna Benónýsdóttir
Rauðhetta, Öskubuska, heimskur grís og geimskrímsli
Kolbrún Anna Björnsdóttir eða Ólöf Hugrún Valdimarsdóttir
Úlfur, prins og geimskrímsli
Guðmundur Elías Knudsen eða Finnbogi Þorkell Jónsson
Sögumaður og álfkona
Heiða Árnadóttir
Leikstjóri og danshöfundur: Kolbrún Anna Björnsdóttir
Búningar: Sigríður Ásta Árnadóttir
Leikmynd: Kristrún Eyjólfsdóttir
Tónlist: Benóný Ægisson
Kvæði: Roald Dahl
Handrit og þýðingar á kvæðum: Benóný Ægisson
Hljóðfæraleikur: Sindri Már Sigfússon, Leifur Gunnarsson, Steingrímur Guðmundsson og Benóný Ægisson
Gerð kennsluefnis: Kolbrún Anna Björnsdóttir og Ragnheiður Gestsdóttir
Lengd: U.þ.b. 60 mínútur
Miðaverð: Almennt verð er 1500 kr. en skólar, leikskólar, foreldrafélög og aðrir geta keypt heilar sýningar og fá þá verulegan afslátt