LÝÐVELDISLEIKHÚSIÐ |
|||||||
|
How Do You Like Iceland?
Leikritið How Do You Like Iceland? eftir Benóný Ægisson er á ensku og hentar því vel til að fræða fáfróða útlendinga um ótvíræða kosti þess að vera Íslendingur og búa á Íslandi. Leikritið er tæpur klukkutími að lengd og leika tveir leikarar fjölmargar persónur sem komið hafa við sögu, allt frá landnámi til vorra daga og endurspegla flest það sem gerir þjóðina einstaka. Áhorfandinn kynnist m.a. Ingólfi Arnarsyni og þrælum hans, Leifi heppna, ferðabókarhöfundinum Dithmari lygapytti Blefken en einnig núlifandi fólki eins og Björk, John Travolta, afkomendum víkinga og fornkonunga, Íslandsvinum og fjandvinum landsins. Leikritið er frjálslega vaxið, einhverskonar blanda af hefðbundnu leikverki, uppistandi og kabarett. Það er einfalt í uppsetningu, leiktjöld eru engin og nánast hægt að sýna hvar sem er. Það myndi henta í hefðbundnu leikhúsi, sem hádegis- eða kvöldverðarleikhús á veitingastöðum, sem kaffileikhús, skemmtiatriði á ráðstefnu, hóteli eða á safni, utanhúss eða um borð í skemmtiferðaskipi. How Do You Like Iceland? er jafnnauðsynleg upplifun fyrir erlenda ferðamenn og Gullni hringurinn, Bláa lónið og rölt upp að Hallgrímskirkju. Leikarar: Darren Foreman og Kolbrún Anna Björnsdóttir 
|
|